葉士域治幾乎肯定降班，據報過半英超球會都有興趣收購主力球員戴納 (Liam Delap)，當中車路士同曼聯最渴望簽入呢位英格蘭前鋒。

車路士經已留意咗戴納一段時間，而藍戰士領隊馬利斯卡 (Enzo Maresca) 亦曾經喺曼城擔當助理領隊，執教過戴納，相當清楚佢嘅能力。

戴納亦同樣列入曼聯今個夏天嘅收購名單，事關紅魔鬼相信佢有能力交出比賀蘭 (Rasmus Hojlund) 同施亞斯 (Joshua Zirkzee) 更好嘅表現。而曾經負責曼城青訓工作嘅曼聯現役技術總監韋確斯 (Jason Wilcox)，喺2019年慧眼識英雄，將戴納由打吡郡帶到曼城。

戴納今季攻入12個聯賽入球，佔全隊31個總入球超過三分一。基本上多間英超球會都有能力負擔戴納嘅轉會費，因為如果葉士域治降班嘅話，佢嘅解約金只係三千萬鎊。

除咗英超球會外，多支歐洲勁旅都想搵返一位傳統中鋒坐鎮，事關呢類球員喺現代足球買少見少。

戴納下季都有機會披上拜仁慕尼黑戰衣，因為教練甘賓尼一直都相當欣賞佢。而現時排喺意甲聯賽榜中游嘅AC米蘭都表示有興趣。

不過最有趣嘅地方就係曼城亦有回購條款，只需要俾四千萬鎊就可以回購戴納。不過藍月亮前鋒線有賀蘭同新加盟兼表現唔錯嘅馬莫殊攻堅，無增兵嘅急切性。

戴納自己亦都係「皇帝女唔憂嫁」，由于好多間球會都俾得起轉會費，所以佢會再考慮出價球會俾得起幾多人工，自己有無正選踢，對方嘅聯賽排名，有無得踢歐聯，有無機會沖擊錦標等等條件。

不過戴納又有無能力可以轉會到大球會之后都能夠交出好表現呢？大家可以參考一下佢嘅入球數字，佢竟然可以喺一支無咩供應嘅球隊攻入12球。數據顯示，只有三位英超射手嘅預期入球數字 (Expected goals) 比佢嘅9球高。戴納亦都十分全面，頭頂腳踢，能夠攻入各式各樣嘅入球，而佢盤球能力更加冠絕所有英超前鋒，平均每場運球距離高達7.3米，令對方守衛防不勝防。

再者，戴納如今只有22歲，仲有好大嘅進步空間，前途無可限量。睇嚟各支球隊將會展開戴納爭奪戰，唔知佢最終情歸何處呢？